Umarangkada na ang pagpapatupad ng motorcycle lane sa dalawang pangunahing kalsada sa Metro Manila.

Ayon sa Metro Manila Development Authority (MMDA) Chairman Francis Tolentino , itatalaga ang 4th lane o pinaka-gitna ng Commonwealth Avenue sa Quezon City para sa mga motorsiklo habang ang outermost o pinaka-kanang lane naman ang magsisilbing motorcycle lane sa Macapagal Boulevard sa Pasay-Parañaque.

Sinabi ni Tolentino na kung liliko pa-kaliwa ang mga nagmo-motorsiklo sa Macapagal Blvd., maaari silang pumasok sa inner lane, 100 metro bago ang intersection.

Nilinaw naman ni Tolentino na hindi exklusibo ang motorcycle lanes sa mga nagmo-motorsiklo dahil maaari rin itong gamitin ng mga pribadong sasakyan sakaling walang masyadong dumadaang motor.

Binanggit din nito na ang ang magiging resulta o epekto ng motorcycle lane sa Commonwealth Avenue at Macapagal Boulevard ang siyang gagamiting basehan kung ipatutupad din ito sa EDSA.

Layon ng mga inilalagay na motorcycle lane na maiwasan ang mga aksidenteng kinasasangkutan ng mga motorsiklo. With report from Dexter Ganibe, Radyo Patrol