Inilunsad ng Bureau of Jail Management and Penology (BJMP) at Office of the Solicitor General (OSG) ang electronic dalaw (e-dalaw).

Sinabi ni BJMP Chief Rosendo Dial na layon ng e-dalaw na mapaglapit ang mga bilanggo at mga kamag-anak nitong nasa laya.

Matagal na aniya itong plano ng BJMP pero ngayon lang naisakatuparan sa tulong ng OSG.

Sa ilalim ng e-dalaw na inilunsad sa Quezon City Jail, pinahihintulutan ang mga bilanggo na makausap ang kanilang mga kamag-anak sa loob ng limang minuto sa pamamagitan ng comupter at internet.

Bibigyang prayoridad ang mga bilanggong hindi madalaw dahil nasa malalayong probinsya ang mga kapamilya nito.

Tulad sa Quezon City Jail, naglaan din ng limang computer sa Women's Correctional sa Mandaluyong.

Mangangalap naman ng karagdagang pondo ang BJMP para palawigin ang e-dalaw.

Sinabi ni Dial na target nilang magkaroon ng e-dalaw sa lahat ng mga piitan na nasa ilalim ng BJMP na pangangasiwaan ng kanilang program management office.

Ang oras ng paggamit ng e-dalaw ay mula alas 9:00 ng umaga hanggang alas 12:00 ng tanghali at muling itutuloy ng ala 1:00 ng hapon hanggang alas 4:00 ng hapon, Lunes hanggang Biyernes.

Bibigyan ang mga inmates ng tigli-limang minuto para makausap ang kanilang mga kamag-anak. Reports from Robert Mano and Johnson Manabat, Radyo Patrols