Isang kasunduan ang nilagdaan ng mga opisyal ng Philippine National Police (PNP), Department of Interior and Local Government (DILG), Department of Transportation and Communications (DOTC), Metropolitan Manila Development Authority (MMDA) at mga transport group ngayong araw para labanan ang kotong.

Kasabay nito, inilunsad din ng apat na ahensya ang Text Anti-kotong na mas pinag-ibayo sa naunang Anti-kotong campaign na ipinatupad ng nakaraang administrasyon.

Ayon kay Zeny Maranan ng Federation of Jeepney Operators and Drivers Association of the Philippines (FEJODAP), nagawang mapababa ng dating Anti-kotong drive ang kaso ng pangogotong pero hindi aniya ito nagtuluy-tuloy kaya bumalik ang dating gawi ng mga tiwaling otoridad.

Sinabi naman ni DILG Secretary Jesse Lobredo na magpupulong ang mga transport sector kada dalawang buwan upang malaman kung nagiging epektibo ang bagong kampanya.

Tiniyak din ng Kalihim na bagama't Metro Manila pa lamang ang sakop ng kampanya, ipakakalat ito sa buong Pilipinas.

Para naman sa mga biktima ng kotong, maaaring iparating ang reklamo sa  0918-888-2749. Report from Edwin Sevidal, Radyo Patrol 37