Maaari nang mag-avail ng limang araw na special emergency leave ang mga empleyado ng pamahalaan na direktang naapektuhan ng kalamidad.

Nakasaad ito sa resolusyong ipinalabas ng Civil Service Commission (CSC) sa harap na rin ng madalas na pagtama ng kalamidad sa bansa.

"With the increasing risks brought about by climate change and global warming, the Commission saw it necessary to offer assistance to state workers affected by natural calamities in the form of special leave. We hope that this would give affected employees respite and ample time to recover," sabi ni CSC Chair Francisco Duque III.

Batay sa CSC Resolution No. 1200289 na ipinalabas noong Pebrero 8, ang mga kawani ng pamahalaan na nakatira sa mga lugar na idineklarang calamity areas ay maaaring mag-avail ng limang araw na special emergency leave. Maaari itong i-avail ng isang buhos o utay-utay sa loob ng 30 araw mula sa deklarasyon ng state of calamity sa isang lugar.

Nakasaad pa sa resolusyon na hindi maaaring ibawas sa leave credits ng empleyado ng 5-day special calamity leave na ito.

Kabilang sa natural calamity o disaster na sakop ng calamity leave ang lindol, pagbaha, pagputok ng bulkan at landslide na nagdulot ng matinding epekto sa buhay ng mga tao, kapaligiran at kabuhayan.