Emosyonal na namaalam ang brodkaster na si Sol Aragones sa DZMM kasabay ng pagkumpirmang tatakbo siya sa darating na halalan.

Sa programang S.R.O. Suhestyon, Reaksyon at Opinyon sa DZMM, nagpasalamat si Aragones sa ABS-CBN, DZMM at kaniyang mga tagasuporta sa 13 taong pagsisilbi niya bilang mamamahayag.

"Si Sol Aragones po ay magbabakasyon muna. Hindi ninyo muna ko makakasama sa ABS-CBN, dito sa S.R.O. Matindi po kasi ang panawagan ng aking mga kababayan sa 3rd district ng Laguna na maglingkod," ang umiiyak na pahayag ni Aragones.

Nagbigay naman ng mensahe ang kaniyang mga naging kasamahan sa trabaho sa DZMM sa pangunguna ni Manila Radio Division Vice President Peter Musngi.

Tatakbo si Aragones bilang kinatawan ng ikatlong distrito ng Laguna sa ilalim ng ticket ng United Nationalist Alliance (UNA) kung saan makakalaban niya si incumbent Rep. Ma. Evita Arago.