Isang lalaki ang natagpuang patay sa loob ng tent city sa Calaanan Relocation Site sa Cagayan de Oro City kaninang madaling araw.

Kinilala ang biktimang si Jesus Noel Buenvenida, 44-anyos na may isang anak at hiwalay sa asawa.

Sa inisyal na imbestigasyon, hinihinalang nagpakamatay ang biktima sa pamamagitan ng pagbigti gamit ang lubid.

Ayon sa mga kaanak, dalawang araw nang iba ang pakiramdam ni Buenvenida.

Nagigising umano ito sa hatinggabi at nagyayayang lumikas dahil may baha at madadaganan sila ng malalaking troso.

Naging matatakutin na rin umano ito at nagsasabing may nakikita siyang kakaiba sa labas ng kanilang tent.

Sabi ng kapatid ng biktima na si Edelyn, labis na ikinalungkot ng kaniyang kapatid ang pagkawasak ng kanilang bahay dahil sa bahang dulot ng Bagyong Sendong.

Matatandaang noong nakaraang buwan, isang lalaki din ang nagpakamatay sa isang evacuation center sa lungsod matapos umanong hindi mabigyan ng matitirhan kahit sa tent city.

Hindi pa nasimulan ang otopsiya kay Buenvenida pero sa paunang imbestigasyon ng Scene of the Crime Operatives (SOCO) ay walang palatandaang may foul play sa nangyari. Report from Fred Dellava, Cagayan de Oro Correspondent