Dumagsa ang daan-daang mga estudyante ng San Beda College para ipagluksa at kondenahin ang pagkamatay ng isang law student na pinaniniwalaang namatay dahil sa hazing.

Ayon sa pamunuan ng San Beda College, hindi nila kinikilala ang Lambda Rho Beta Fraternity na sinasabing nasa likod ng hazing na nagbunsod sa pagkasawi kay Marvin Reglos.

Sa katunayan anila, walang anumang fraternity na kinikilala ang eskwelahan lalo na sa college of law.

Suspendido ang klase sa San Beda para mabigyan ng pagkakataon ang mga estudyante, lalo na ang mga malalapit na kaklase at kaibigan ni Reglos, na ipagluksa ang pagkamatay nito.

Ayon naman kay Atty. Risel Castillo-Taleon, ang Prefect of Studies ng San Beda Law, ginagawa na nila ang kanilang makakaya para makilala ang mga iba pang miyembro ng Lambda Rho lalo na ang mga sangkot sa hazing.

Labis din ang pamimighati ng pamilya ni Reglos at nanawagan sa ibang miyembro ng fraternity na tulungan sila sa paghahanap ng hustisya.

Bumuo na ang San Beda ng komite para imbestigahan ang pag-ooperate ng mga freaternity sa loob ng eskwelahan gayundin para tumulong sa mga awtoridad. Report from Ron Gagalac, ABS-CBN News