(UPDATE) Hinamon ni Supreme Court (SC) Chief Justice Renato Corona si Pangulong Benigno "Noynoy" Aquino III na ilabas ang psychological records nito na aniya ay matagal nang isyu.

Ito ang naging bwelta ni Corona sa panibagong banat ni Pangulong Aquino na hindi tugma ang nakadeklara sa statement of assets, liabilities and net worth (SALN) ng punong mahistrado sa nilalaman ng mga bank account nito.

"Marahil, higit na makabubuti kung ilabas na rin ninyo, Ginoong Pangulo, ang inyong SALN, at ipaliwanag ito sa taong-bayan. Siguro, isama ninyo na rin ang inyong bank accounts at psychological records na matagal ng isyu."

Matatandaang noong 2010 Presidential Election ay naging mainit na isyu ang kalagayan ng pag-iisip ni Pangulong Aquino matapos lumabas ang umano'y kopya ng medical record nito kung saan nakasaad na dumanas ito ng depression.

Ayon pa kay Corona, bilang pinuno ng bansa ay mayroon silang obligasyon na ipakitang maayos ang kanilang pag-iisip.

Nanawagan rin si Corona kay Pangulong Aquino na huwag pakialaman, pangunahan at impluwensyahan ang Senate impeachment court dahil may sarili itong prosesong sinusunod na siyang itinakda ng Saligang Batas.

Agad namang sinagot ng Palasyo ang mga banat ni Corona.

Ayon kay Deputy Presidential Spokesperson Abigail Valte, sa hinahaba raw ng pahayag ng chief justice ay hindi pa rin nito sinagot ang tanong kung bakit iba ang lumabas sa kaniyang SALN sa mga natuklasang ari-arian at kayamanan sa impeachment trial.

Muling iginiit ng Palasyo na walang personalan dito at ang tanging ipinaglalaban lang daw nila ay ang sistemang pang-katarungan.

Buo rin daw ang tiwala ng Malakanyang sa Senado na siyang huhusga kung dapat pa bang manatili ang punong mahistrado sa pwesto. With report from Alex Calda, Radyo Patrol 43