Pinaalalahanan ng Catholic Bishops Conference of the Philippines (CBCP) ang pamahalaan at iba't ibang sektor na huwag gamitin sa pansariling interes ang paggunita ng ika-26 na anibersaryo ng EDSA People Power 1.

Ayon kay CBCP President at Cebu Archbishop Jose Palma, maaaring gamitin ang selebrasyon para sa pansariling motibo at interest ng ilan, sa halip na gamitin ang selebrasyon para sa development, common good at pagbibigay ng pag-asa sa mamamayan.

Sinabi pa ni Palma na dapat ay patuloy na ipagmalaki ng mga Pinoy ang paggunita sa isang bloodless revolution dahil patunay lamang ito na ang mga Pilipino ay mabubuting tao, na sumusunod sa utos ng Panginoon at nagsisikap para sa pagkakaisa ng mga mamamayan sa bansa.

Sa kabila naman nito, inamin ni Palma na bagama't nakamit ang kalayaan sa pamamagitan ng mapayapang EDSA People Power, hindi pa rin ito nagbunga ng magandang pamumuhay sa mga mamamayan matapos ang 26 na taon. Report from Noel Alamar, Radyo Patrol 38