(UPDATE 3) Inalis na ng Philippine Institute for Volcanology and Seismology (Phivolcs) ang ipinalabas nitong tsunami alert number 2 sa Negros at Cebu islands matapos tumama ang magnitude 6.9 na lindol kaninang alas 11:49 ng umaga.

Bago mag-alas 3:00 ngayong hapon nang alisin ang tsunami alert pero bandang alas 2:00 ng hapon, iniulat ni Dr. Ismael Narag, officer-in-charge ng Seismology Division ng Phivolcs na may naitala na silang bahagyang paggalaw ng tubig sa pagitan ng Cebu at Negros pero hindi malaki at hindi mapaminsala.

Samantala, nakapagtala na ng 42 aftershocks ang Phivolcs hanggang kaninang alas 2:06 ng hapon.

Pinakamalakas na naitala ay magnitude 5.8.

Lumawak din ang mga lugar na naramdaman ang lindol:

Intesity 7, naramdaman sa Dumaguete City at Valle Hermoso, Negros Oriental;

Intensity 6 - La Carlota City at La Castellana, Negros Occidental at Argao, Cebu

Intensity 5 - Roxas City, Dao at Ivisan, Capiz; Iloilo City; Ayungon, Negros Oriental; Kanlaon City, Lapu-lapu City; Guimaras, Cebu City, San Carlos City, Bacolod City, Tagbilaran City at Binalbagan, Negros Occidental

Intensity 4 - San Jose de Buenavista, Pandan, Anini-Y at Patnongon Antique; Kalibo, Aklan; Dipolog City, Sipalay, Negros Occidental at Ormoc City

Intensity 3 sa Butuan City, Agusan del Norte; Legaspi City, Albay; Carmen, Cagayan de Oro: Tacloban City, Leyte; Catbalogan, Samar St. Bernard, Southern Leyte; Masbate City at Cagayan de Oro City

Intensity 2 - Cabid-an, Sorsogon; Borongan, Eastern Samar at Mambajao, Camiguin

Intensity 1 - Pagadian City

Sinabi ni Department of Science and Technology (DOST) Secretary Mario Montejo na sampung segundong naramdaman ang pagyanig kaninang umaga.

Nilinaw naman ni Phivolcs Deputy Executive Director Bart Bautista na ang naganap na lindol kanina ay walang kinalaman sa serye ng mga pagyanig sa Leyte nitong weekend.

""Yung earthquake, walang kinalaman sa lindol sa Leyte, separate structure ang gumalaw sa Leyte. sa ngayon, sinasabi lang namin na yung eartquake (sa Negros) ay nangyari sa isang unmapped fault sa may negros island," ayon kay Bautista. With reports from Dennis Datu, Radyo Patrol 42 and Charlie Mendoza, DZMM Correspondent