Halos mabali ang kaliwang braso ng 7-taong gulang na batang lalaki matapos maipit sa escalator ng isang supermarket sa Monumento, Caloocan City kagabi.
    
Inoperahan sa MCU Hospital si Felix Aparejado dahil sa matinding pinsalang tinamo ng braso ng biktima.
    
Ayon kay Melody Aparejado, tiyahin ng bata, naipit sa escalator ang kaniyang pamangkin matapos matapilok at napahiga ito habang pababa sa ground floor.
    
Inabot ng halos apat na oras bago natanggal ang kamay ng biktima sa escalator dahil hindi umano kaagad pinapasok ng mga guwardiya ng supermarket ang rescue team ng Metro Manila Development Authority (MMDA).

Sinisi naman ni Melody ang management ng supermarket sa insidente. "Kung may guwardya po doon maitatayo nya sana yung pamangkin ko."

Pero giit ng ni Norman Baclao, officer-in-charge ng Puregold, malaki rin ang pagkukulang ng tiyahin sa nangyari.

"Negligence nya yun e. Naiwan nya yung bata na naglalaro sa funhouse, sumakay sa escalator kaya nadisgrasya."

Nangako naman ang pamunuan ng Puregold na pananagutan ang lahat ng gastusin sa nadisgrasyang bata. Reports from Zandro Ochona, Radyo Patrol and ABS-CBN News