Tinapos na ng prosekusyon ang pagtalakay sa Article 3 ng impeachment complaint na tumutugon sa alegasyon patungkol sa umano'y kawalan ng integridad ni Supreme Court (SC) Chief Justice Renato Corona para manatili sa liderato ng hudikatura.

Ito'y matapos na hindi payagan kahapon ni Presiding Officer Juan Ponce-Enrile ang pagpiprisinta kay Philippine Airlines (PAL) Vice President for Sales Enrique Javier sa kabila ng pagpipilit ng prosekusyon.

Batay sa naging desisyon ng impeachment court, walang direktang kaugnayan ang magiging testimonya ni Javier tungkol sa mga espesyal na pribelihiyo na natanggap ni Corona sa alegasyong tinutukoy sa Article 3.

Ayon kay House prosecutor Rep. Georgidi Aggabao, hindi na sila magpiprisinta ng mga ebidensya at testimonya na tumutugon sa tatlong nalalabi pang kaso na nakapaloob sa Article 3.

Dahil dito, hindi na isasama ang mga kasong tumatalakay sa labis umanong ugnayan ng chief justice kay dating pangulong Gloria Arroyo na nagresulta sa pagkakatalaga kay Ginang Cristina Corona sa John Hay Management Corporation (JHMC).

Hindi na rin magpiprisinta ang prosekusyon ng mga testigo at ebidensya sa kaso patungkol sa umano'y paggamit ni Corona ng public funds sa mga bagay na personal at pakikipag-usap nito sa mga litigants na may nakabinbing kaso sa Korte Suprema.

Nangangahulugang ang kaso na lamang hinggil sa umano'y pagbaligtad sa unang desisyon sa kaso ng Flight Attendants and Stewards Association of the Philippines (FASAP) laban sa PAL ang mananatili at si FASAP President Roberto Anduiza na ang huling testigo para sa Article 3.

Sa puntong ito, sinubukan pang hilingin ni defense lead counsel Justice Serafin Cuevas na matanggal ang naging testimonya ni Anduiza dahil wala rin aniya itong direktang kinalaman sa Article 3.

Nagdesisyon naman si Enrile na hayaan na lamang manatili ang testimonya ni Anduiza sa opisyal na record ng impeachment court.