Makasaysayang tinanggap ni Carlos 'Kesz' Valdez, 13-anyos ang prestihiyosong International Children's Peace Prize ngayong taon.

Iginawad ni 1984 Nobel Peace Prize winner Archbishop Desmund Tutu ang parangal kay Kesz sa makasaysayang Ridderzaal o Knights Hall sa The Hague, Netherlands.

Kinilala ng award-giving body ang serbisyo publiko ni Kesz na tubong Cavite sa pamamagitan ng pagbuo ng kanyang grupo na 'Caring Children' na nakatulong na sa 246,000 kabataan sa nakalipas na anim na taon.

"For the Philippines, you may have difficulties but those difficulty seem to keep producing outstanding young people like Kesz which give hope that nothing ultimately can defeat us," mensahe pa ni Tutu.

Kinikilala ang naturang parangal bilang katumbas ng Nobel Peace Prize para sa mga kabataan na nakagawa ng malaking kontribusyon sa kabila ng kanilang edad.

Inaalay naman ni Kesz ang tropeo sa mga batang lansangan ng Pilipinas.

"Lalo na mga batang kalye sa Pilipinas, 'wag po silang mawawalan ng pag-asa. Naniniwala po ako na hindi po hadlang ang edad natin. Hindi po hadlang ang status natin sa buhay para din po makatulong sa ibang tao. Mag-ambag sa ating lipunan, sa ating country sa Pilipinas."

Kabilang pa sa finalists sa kompetisyon sina Amina, 15-anyos mula Ghana at Anwara, 16-anyos mula India. With report from ABS-CBN News and photo from childrenspeaceprize.org