Bahagyang nagkagirian sina Sharon Cuneta at Kris Aquino bunsod ng isang parody interview sa isang blog.

Inakala kasi ng megastar na si Aquino talaga ang nakapanayam ng blogger na si The Professional Heckler kung saan nagkomento ang parody version na si "Krissy" na ayaw nitong i-follow sa Twitter si Cuneta dahil ayaw nitong ma-stress.

"Ayokong ma-stress aha-ha-ha But I follow KC."

Gumanti naman si Cuneta at sumagot sa kaniyang opisyal na Twitter account (@sharon_cuneta12) at sinabing "'Yaan na natin. Di ko rin naman sya fina-follow ever. Sasakit ang ulo ko."

Pero agad nilinaw ni Aquino na hindi siya ang nagbigay ng mga naturang pahayag at hindi siya ang nakapanayam ng blogger.

"@krisaquino214 : I don't understand y u want to create animosity? It was the parody "krissy" who commented about @sharon_cuneta12."

Lumalabas na nagpadala din ng text message si Aquino kay Cuneta bilang paglilinaw na wala siyang sinasabing anumang masamang bagay tungkol sa kapwa aktres.

Maging ang blogger na si Professional Heckler ay nagbigay ng pahayag sa kaniyang Twitter: "@HecklerForever : Dear everyone, my blog post titled EXCLUSIVE: Krissy Returns is a parody interview. I did NOT interview Ms Kris Aquino!"

Bunsod nito, humingi ng paumanhin si Cuneta sa pamamagitan pa rin ng kaniyang Twitter.

"This has taught me another important lesson: We should really be careful who we believe here on Twitter. There are lots of people pretending to be us artistas & we should make sure that we know who's talking before we react, especially if what we read hurts us. Sorry about that, Kris. And sorry, everyone. Thanks!"