Kinumpirma ng aktres at komedyanang si Melai Cantiveros na hiwalay na sila ng aktor si Jason Francisco.

Nang bumisita ang mga dating housemates sa Pinoy Big Brother house (PBB) kamakailan, kinumpirma ni Melai sa kasalukuyang housemates na sina Carlo Romero at Deniesse Joaquin na wala na nga sila ni Jason.

Gayunman, sinabi ni Melai na hindi siya galit sa dati niyang kasintahan.

Inamin naman ni Jason kay "Big Brother" ang estado nila ni Melai.

"Aaminin ko kaming dalawa hindi kami marunong magtago ng feelings ng emotions. Kaya nga noon nakita mo, hindi ako masyadong pinapansin. Aaminin ko may tampuhan kaming dalawa pero dumarating naman 'yon at nagkataon lang na bigla kaming pumasok dito eh nasa moment pa kami ng tampuhan. Pero it doesn't mean na hiwalay na kami forever," sabi niya.

"Sa natatandaan ko kasi hindi ko siya na-invite sa bahay ni Pareng Paul Jake. Akala niya, na-feel niya lang, na di siya importante sa akin. In-explain ko naman sa kanya na minsan ay gusto ko ding mag-isa kasi may iniisip ako para sa amin. So na-feel niya yata nanlalamig ako sa kanya o wala na akong feelings".

"Hindi ako nagso-sorry sa kanya so gusto niya lang akong mag-sorry. Ako naman ayaw kong mag-sorry kasi wala naman akong kasalanan," dagdag ni Jason.

Bagama't hiwalay na, sinabi ni Jason na mahal niya pa rin si Melai.

"Siyempre naman mahal, as in ganoon pa din. Sinabi ko sa kanya dati na kung 'di dahil sa kanya ay di ako magtagal dito (sa PBB house). So ganoon din sa labas. Kasi siya lang ang tao na alam kong magiging kakampi ko at kasangga ba".

Noong nakaraang linggo, tumanggi ang mga producer ng hit comedy show na "Banana Split" na ibahagi ang dahilan ng pag-alis ni Jason sa programa.

Napabalitang umalis si Jason sa naturang show dahil sa hindi nila pagkakaunawaan ni Melai. Report from ABS-CBN News